உச்சநீதிமன்றத்துக்கும் அச்சமில்லாப் பெண்ணுக்கும் நன்றி! {50ஆவது பதிவு!}

தவற்றைத் தட்டிக் கேட்க உரிமை கோரும்பொழுதே, நல்லதைப் பாராட்ட வேண்டிய கடமையும் நமக்கு வந்து சேர்ந்து விடுகிறது!

அவ்வகையில், தமிழர்களின், இந்தியாவில் வாழும் மக்கள் அனைவரின் நெஞ்சார்ந்த நன்றிக்குரிய விதத்தில் அண்மையில் உச்சநீதிமன்றம் வழங்கியுள்ள ஒரு தீர்ப்பை நாம் பாராட்டியே ஆக வேண்டும்! தகவல் தொழில்நுட்பச் சட்டத்தின் 66(அ) பிரிவு செல்லாது என உச்சநீதிமன்றம் அறிவித்திருப்பதுதான் அது!

அதிகாரத்தில் இருப்பவர்களும் செல்வாக்குப் பெற்றவர்களும் என்ன வேண்டுமானாலும் ஆட்டம் போடலாம்; ஆனால், மக்கள் அதை எதிர்த்து ஒரு வார்த்தை கூடப் பேசி விடக்கூடாது என்று சொல்லாமல் சொல்லும் வகையில் இயற்றப்பட்ட இந்தப் பிரிவை வைத்து அரசியலாளர்கள் அடித்த கூத்துக்கள் நாம் அறியாதவையல்ல.

கருத்துப்படம் வரைந்தாலே கழுத்தைப் பிடித்துச் சிறையில் தள்ளினார்கள், முகநூலில் நிலைத் தகவல் போட்டாலே கைகளுக்குக் காப்புப் போட்டார்கள், அதற்கு விருப்பம் தெரிவித்தால் கூட அவரையும் சேர்த்து உள்ளே தள்ளினார்கள்!

சுதந்திர நாடு, உலகிலேயே மிகப் பெரிய மக்களாட்சி நாடு என்றெல்லாம் பெருமை பேசிக் கொண்டு ‘கருத்து வெளியிட்டால் கைவிலங்கு, விருப்பம் தெரிவித்தால் சிறையரங்கு’ என்று இப்படி அரசர் கால அடக்குமுறைச் சட்டங்களைப் போன்ற ஒரு சட்டத்தை வைத்து நாடு நடத்துகிறோமே என்கிற வெட்கம் நாட்டை ஆள்பவர்களுக்குத் துளியும் இல்லாவிட்டாலும், நாட்டுக் குடிமகள் ஒருவருக்கு இது பற்றிய கவலையும், சட்டப்பூர்வமாக இதற்கு என்ன செய்யலாம் என்கிற தெளிவான பார்வையும் முயற்சியும் இருந்ததன் விளைவு இதோ, இந்த வரலாற்றுச் சிறப்பு வாய்ந்த தீர்ப்பு!

“தகவல் தொழில்நுட்பச் சட்டத்தின் 66(அ) பிரிவு மக்களின் கருத்துரிமையை நேரடியாகப் பாதிக்கிறது. இந்தச் சட்டப் பிரிவின் மூலம் பேச்சு, கருத்து சுதந்திரம் தொடர்பான அடிப்படை உரிமைகள் பறிக்கப்படுகின்றன என்பது தெளிவு. ‘எரிச்சலூட்டுவது’, ‘தர்மசங்கடம் ஏற்படுத்துவது’, ‘ஆட்சேபகரமானது’, ‘பாதிப்பை ஏற்படுத்துவது’ போன்ற வார்த்தைகள் தெளிவில்லாதவை. இதைக் காவல்துறையினர் எப்படி வேண்டுமானாலும் அர்த்தப்படுத்தி நடவடிக்கை மேற்கொள்ள முடியும். குற்றம் சாட்டப்படுபவர் நல்லெண்ணத்தில் பதிவேற்றம் செய்த கருத்துக்குத் தவறான அர்த்தம் கற்பித்து அவரைக் காவல்துறையினர் கைது செய்ய முடியும். இது அரசியல் சட்டம் வழங்கி இருக்கும் தனிமனிதக் கருத்து சுதந்திர உரிமைக்கு எதிரானது. அதனால், இந்தச் சட்டப் பிரிவை நீக்கி ஆணையிடுகிறோம்” என்று இந்திய நீதித்துறைக்கு என்றென்றும் பாடமாக வைக்கக்கூடிய அளவுக்கு ஓர் அரும்பெரும் தீர்ப்பை வழங்கியிருக்கிறது நீதிபதிகள் செலமேசுவரர், நாரிமன் அமர்வு.

இதற்கான பொதுநல வழக்கைத் தொடுத்து, இப்படி ஒரு தீர்ப்புக் கிடைக்கக் காரணமாக விளங்கிய இளம்பெண் சிரேயா சிங்கால் அவர்கள்தாம் இதில் நம் முதல் நன்றிக்கு உரியவர்.

வழக்குரைஞர் குடும்பத்தைச் சேர்ந்த இவர், குறிப்பிட்ட இந்தச் சட்டப் பிரிவு மீண்டும் மீண்டும் தவறாகப் பயன்படுத்தப்படுவது கண்டு கொதித்தெழுந்து கடந்த 2012ஆம் ஆண்டில் வழக்குத் தொடுத்திருக்கிறார். அதன் மூலம் இந்தியாவில் மீண்டும் கருத்து சுதந்திரத்தை நிலைநாட்டியிருக்கும் இந்தப் பெண், இந்த இளம் வயதிலேயே ஒட்டுமொத்த இந்தியாவின் போற்றுதலுக்கு உரியவராக ஆகியிருக்கிறார். (இவர் பற்றி விரிவாக அறிய: சமூக ஊடக சுதந்திரத்திற்காக வழக்கு தொடுத்து வென்ற ஷ்ரேயா சிங்கால்!)

ஈழப் பிரச்சினையிலும் இன்ன பிற தமிழர் இனப் பிரச்சினைகளிலும் இந்திய அரசுகள் மறுபடியும் மறுபடியும் மேற்கொண்டு வரும் தவறான நடவடிக்கைகளால் இனத்தையே காவு கொடுத்து விட்டு நிற்கும் தமிழர்கள், மிச்சமிருக்கிற இனமும் எப்பொழுது அழியுமோ, இன்னும் எத்தனை நாட்களுக்குத் தங்கள் மொழியும் பண்பாடும் எஞ்சியிருக்குமோ என்கிற மன உளைச்சலால் அல்லும் பகலும் தவிக்கிற நம் மக்கள், இந்தத் தவறான நடவடிக்கைகள் தங்களை எப்படியெல்லாம் பாதிக்கின்றன என்பதை ஆள்பவர்கள் உணரும்படி எடுத்துரைக்கக் கூட முடியாமல் இந்தச் சட்டப் பிரிவு தடையாக இருந்தது. குறிப்பிட்ட பிரச்சினைகள் பற்றிய விழிப்புணர்வுத் தகவல்களைப் பரிமாறிக் கொள்ளக் கூட முடியாத அளவுக்கு இது நம் கழுத்தை நெரித்தது.

இப்படி மொத்த இனமும் அழிவின் விளிம்பிலிருக்கும் நிலையிலும் ஒற்றுமைப்படாமல் இன்றும் சாதி, சமயம் எனத் தம் மக்கள் பிரிந்து கிடப்பதைப் பார்த்து அளவில்லா வேதனையில் இருக்கும் தமிழ்ச் சமூக ஆர்வலர்கள் தங்கள் மக்களுக்குச் சில விதயங்களை உறைக்கும்படி உரைக்கக் கூடத் தயங்க வேண்டியிருந்தது. படுகிற வேதனை ஒருபுறம் என்றால், வாய்விட்டுக் கத்தவும் கூடாது என்பது அதைவிடக் கொடுமை!

அப்பேர்ப்பட்ட இந்தக் கடுமையான சட்டப் பிரிவை நீக்கியதற்காக மேன்மை தங்கிய நீதியரசர்களுக்கும் இளைஞர் சிரேயா சிங்கால் அவர்களுக்கும் தமிழ்ச் சமூகத்தின் சார்பில் நெஞ்சார்ந்த நன்றி!

பதிவர்கள் (bloggers), கீச்சர்கள் (tweeters), வாட்சு ஆப்பினர், இணைய இதழ் நேயர்கள் முதலான இணையப் பயனாளிகள் மட்டுமல்லாமல் போராளிகள், சமூக ஆர்வலர்கள், எழுத்தாளர்கள், இதழாளர்கள், பொதுமக்கள் என அத்தனை பேரும் கொண்டாட வேண்டிய தீர்ப்பு இது!

அதிகாரத்தில் இருப்போர் தவறு செய்தால் கடும் சொற்களால் விமரிசிக்கும் நாம், அதே அதிகார மட்டத்தைச் சேர்ந்த நீதித்துறையினர் நமக்குச் செய்துள்ள இந்த நன்மையைத் தவறாமல் போற்றவும் செய்வோம்! 

❀ ❀ ❀ ❀ ❀

படங்கள்: நன்றி ௧. Legaleagle86 at en.wikipedia, ௨. விகடன் 

 பதிவுகளை உடனுக்குடன் பெறக் கீழ்க்காணும் பொத்தானைச் சொடுக்கி
வாட்சாப் தடத்தில் (Whatsapp Channel) இணையுங்கள்!!