போராளியைத் தெருவில் நிறுத்திய போராளி! தலைவர்கள் அமைதி! ஏன்? - சில கேள்விகள், சில கோரிக்கைகள்

கவிஞர்.தாமரை மகனுடன் போராட்டத்தில்

உண்ணாநிலைப் போராட்டங்கள் தமிழ்நாட்டுக்கு ஒன்றும் புதிதில்லை. ஆனால், புகழ் பெற்ற போராளி ஒருவரை நோக்கியே அப்படி ஒரு போராட்டம் எழுந்திருப்பது வரலாற்றிலேயே இதுதான் முதன் முறையாக இருக்கும் என நினைக்கிறேன்.

தோழர் தியாகு! – தமிழர் போராட்ட வரலாற்றில் தவிர்க்க முடியாத பெயர்! பெருந்தலைவர் காமராசர் காலத்திலிருந்து அரசியலில் இருப்பவர். தீவிரப் பொதுவுடைமையாளர்! நக்சல் இயக்கத்தில் இணைந்து போராடியதற்காகப் பதினைந்து ஆண்டுகள் சிறைத் தண்டனை அடைந்தவர். அதே நேரம், ஈழ ஆதரவுப் போராட்டத்தில் ஈடுபட்டதற்காக மார்க்சியப் பொதுவுடைமைக் கட்சியை விட்டே வெளியேற்றப்படவர்! ‘தாய்த் தமிழ்ப் பள்ளி’ எனும் பெயரில் பல தமிழ்வழிப் பள்ளிகளை நடத்தி, தமிழருக்காகப் போராடுவதோடு மட்டுமின்றித் தமிழைக் காக்கவும் பெருமுயற்சியெடுத்து வரும் பெருந்தகையாளர்! மாவீரர்.திலீபன் உண்ணாநிலைப் போராட்டம் நடத்தி உயிர் ஈந்தபொழுது ஈழத்துக்காகக் குரல் கொடுத்தது முதல் முல்லைப் பெரியாறு போன்ற அண்மைக்காலத் தமிழர் பிரச்சினைகளுக்காகக் களமாடுவது வரை இவர் ஈடுபடாத போராட்டங்களே இல்லை! எல்லாவற்றுக்கும் மேலாக, ‘இலங்கையில் பொதுநலவாய (commonwealth) மாநாடு’ நடத்தப்படக்கூடாது என்று வலியுறுத்தி ‘வெற்றி அல்லது வீரச்சாவு’ என்ற பெயரில் இவர் நடத்திய ‘சாகும் வரை உண்ணாநிலைப் போராட்டம்’ பன்னாட்டளவில் அறியப்பெற்ற ஒன்று!

இப்பேர்ப்பட்ட போராளியை நோக்கியே ஒரு போராட்டத்தை நடத்தி வருகிறார் பெண்மணி ஒருவர். அதுவும், யாரோ தெருவில் போகிற பெண்மணியில்லை; இவர்தம் சொந்த மனைவி! அதுவும், பெற்ற பிள்ளையுடன் இவர் இருக்குமிடமெல்லாம் தேடித் தேடித் தொடர்ந்து சென்று ஏழு நாட்களாகத் தன் போராட்டத்தைக் கடைப்பிடித்து வருகிறார் அந்தப் பெண்மணி. அவர் வேறு யாருமில்லை; உலகத் தமிழர்கள் அனைவரும் நன்கறிந்த திரைப் பாடலாசிரியரும், தமிழ்ப் போராளியுமான கவிஞர்.தாமரை அவர்கள்தாம்!

ஈழ இனப்படுகொலையின்பொழுதும் அதன் பின்புமான போராட்டங்களில் கவிஞர்.தாமரை அவர்களின் பங்கு நாம் அறியாததில்லை. தமிழனென்று மீசை முறுக்கிய ஆண் கவிஞர்கள் பலர் வீட்டிலிருந்தபடி ஈழத் தமிழர்களுக்காகத் தங்கள் கண்ணீரால் கவிதை வடித்துக் கொண்டிருந்த அந்த வேளையில், பெண்ணென்று தயங்காமல் போராட்ட மண்ணில் நேரடியாகக் கால் பதித்த வீராங்கனை! “இலங்கைத் திரைப்பட விழாவுக்குப் போக வேண்டா” என்று கமல்காசனையே வலியுறுத்திய துணிச்சல்காரர்! அசைக்க முடியாத மக்கள் செல்வாக்குப் பெற்ற நடிகர்களும் தலைவர்களுமே ஈழத்துக்காகவும், ஈழத் தமிழர்களுக்காகவும் மட்டுமே குரல் கொடுப்பதோடு வாயைப் பூட்டிக் கொண்ட அந்த நாளிலே, தமிழினத்தை அழிக்கத் துணை நின்ற இந்திய அரசை நேரடியாகவே சாடிய மறத் தமிழச்சி! ‘கண்ணகி மண்ணிலிருந்து ஒரு கருஞ்சாபம்’ என்ற தலைப்பில் இவர் எழுதிய அந்தக் கவிதை இந்த உலகப் பந்து உருளும் வரை தமிழினப் பேரழிப்புக்கான சான்றாவணமாய் நிலைத்து நிற்கும்!

அப்பேர்ப்பட்ட பெண்மணி பெற்ற பிள்ளையுடன் இன்று நடுத்தெருவில் நிற்கிறார்! ஆனால்,
இன்று வரை இவர் சார்ந்த திரைத்துறையிலிருந்தோ, எழுத்துலகிலிருந்தோ யாரும் வந்து எட்டிக் கூடப் பார்த்ததாகத் தெரியவில்லை. அட, அவர்கள் இருக்கட்டும்! தமிழ்க் கவிஞரும் தமிழினப் போராளியுமான இவருக்கு ஆறுதல் கூறத் தமிழினப் போராளிகளோ தலைவர்களோ கூட இதுவரை முன்வந்ததாகத் தெரியவில்லை. இப்பேர்ப்பட்ட ஓர் அவலம் ஒரு போராளிக்கு வேறு எந்த இனத்திலோ நாட்டிலோ நடக்க முடியுமா என்பது கேள்விக்குறிதான். தமிழினத்தில்தான் போராளிகள் இந்த அளவுக்கு மோசமானதோர் அலட்சியத்தை எதிர்கொள்ள முடியும்; அதுவும் போராளிகளிடமிருந்தே!

மற்றவர்கள் கிடக்கட்டும்! கட்டிய கணவர் கூட இன்று வரை இவர் போராட்டத்தைக் கண்டு கொள்ளவில்லை என்பதுதான் பெருங்கொடுமை!

தான், தன் குடும்பம், தன் சுற்றம் எனத் தன்னலமாக வாழும் சராசரி மக்கள் இனம், மொழி, நாடு, உலகம் என அனைவருக்காகவும் சிந்திக்கிற, கவலைப்படுகிற பரந்த மனம் கொண்டவர்களாக மாற விரும்பும் அளவுக்கு முன்னோடியாக வாழ்ந்து காட்டுவதுதான் உண்மையான ஒரு போராளிக்கு, சமூக அக்கறையாளருக்கு உண்டான அடிப்படைத் தகுதி. ஆனால், தோழர். தியாகு அவர்களோ, நேற்று வரை ஈழ விடுதலை, மரண தண்டனை ஒழிப்பு, அரசியல் புரட்சி என்று வாழ்ந்து வந்த பெண்மணி ஒருவரை இன்று தன் மகனுக்காகவும் தனக்காகவும் போராடும் சராசரித் தமிழ்ப் பெண் போல மாற வைத்திருக்கிறார். இதுதான் ஒரு போராளி நடந்து கொள்ளும் முறையா?

கட்டிய மனைவி பெற்ற பிள்ளையுடன் தான் போகும் இடமெல்லாம் தொடர்ந்து வந்து போராட்டம் நடத்திக் கொண்டிருக்கிறார்; ஆனால், அவருக்குப் பதில் சொல்லாத இவர் தொலைக்காட்சி தொலைக்காட்சியாக நேர்காணல் அளித்துக் கொண்டிருக்கிறார்!

“இனி நான் அவருடன் சேர்ந்து வாழ முடியாது. அவர் விரும்பினால் நான் மணவிலக்களிக்க ஆயத்தமாக இருக்கிறேன்” என்கிற ஒரே பதிலை ஒலிவாங்கியைத் (mic) தூக்கிக் கொண்டு வருகிற மூன்றாம் மனிதர்கள் அனைவரிடமும் சளைக்காமல் மீண்டும் மீண்டும் சொல்லிக் கொண்டிருப்பவர் அந்தப் பதிலைத் தன் வீட்டு வாசலில் காத்துக் கிடக்கும் தன் மனைவியிடம் கூற எவ்வளவு நேரம் ஆகிவிடும்?

தீவிரவாதியாக ஆயுதமேந்திப் போராடிய வீரர் ஒருவருக்கு எந்தவித ஆயுதமும் இல்லாமல் நடுத்தெருவில் நிற்கும் பெண்மணி ஒருவரைச் சந்திக்க அப்படி என்ன அச்சம்?

தன் மனைவி தன்னை நோக்கி நடத்தும் போராட்டத்தையே மதிக்காத இவர் தன்னுடைய போராட்டத்தை உலகின் ஏதோ ஒரு மூலையிலிருக்கும் அதிகார மட்டத்தினர் மதித்துப் பதிலளிப்பார்கள், நடவடிக்கை எடுப்பார்கள் என எந்த அடிப்படையில், எப்படி எதிர்பார்க்கிறார்?

‘இதையெல்லாம் கேட்க இவன் யார்’ எனும் கேள்வி இதைப் படிக்கும் உங்களுக்கு எழலாம்.

ஐயா தியாகு அவர்கள் தன் மனைவியுடன் சேர்ந்து வாழட்டும் அல்லது பிரிந்து போகட்டும்; அஃது அவருடைய தனிப்பட்ட விருப்பம்! அதில் நாம் தலையிடவும் முடியாது; கேள்வி எழுப்பவும் முடியாது! ஆனால், தன்னை நோக்கிப் போராட்டம் நடத்தும் ஒருவரை அவர் எப்படி இந்த அளவுக்கு அலட்சியப்படுத்தலாம் எனக் கேள்வி கேட்க மனச்சான்றுள்ள மனிதர் யாருக்கும் முழு உரிமை உண்டு! அந்த உரிமையின் பெயரால் தியாகு அவர்களைப் பற்றி மேற்கண்ட கேள்விகளை எழுப்பியிருக்கும் நான், அதே உரிமையின் பெயரால் நான் பெரிதும் மதிக்கும் வை.கோ, சீமான், பழ.நெடுமாறன், விடுதலை இராசேந்திரன், கொளத்தூர் மணி, பெ.மணியரசன் ஆகிய தமிழினத் தலைவர்களை நோக்கியும் மே பதினேழு, சேவ் தமிழ்சு, தமிழீழ விடுதலைக்கான மாணவர் கூட்டமைப்பு ஆகியவற்றை நோக்கியும் கூடச் சில கோரிக்கைகளை முன்வைக்க விரும்புகிறேன்!

தமிழ் உணர்வாளர்களை நோக்கிக் கவிஞர்.தாமரையின் கேள்வி!

அன்பிற்கும் பெருமதிப்பிற்கும் உரிய தலைவர்களே!

இது கணவன்-மனைவிக்கிடையிலான பிரச்சினை எனத் தாங்கள் வாளாவிருப்பது கூடாது! காரணம், பிரச்சினையில் தொடர்புடைய இருவருமே தமிழினப் போராளிகள். நேற்று வரை தமிழருக்காகப் போராடிய ஒரு பெண்மணி, இன்று சொந்த வாழ்வில் பாதிக்கப்பட்டு நீதி கேட்டு நிற்கையில் அவருக்குத் துணை நிற்க வேண்டியதும், தங்களோடு மிகுந்த நெருக்கமுடைய அவர் கணவரை இது குறித்துப் பதிலளிக்கச் செய்ய வேண்டியதும் தங்கள் கடமை என்பதைத் தாங்கள் மறந்துவிடலாகாது!

போராட்டங்களை அலட்சியப்படுத்துவது என்பது அதிகார மட்டத்தில் இருப்பவர்களின் செயலாகத்தான் இது நாள் வரை இருந்து வந்தது. ஆனால், போராளியான தோழர்.தியாகு அவர்களே இப்பொழுது அப்படி நடந்து கொள்வது மற்ற போராளித் தலைவர்களைப் பற்றியும் மக்கள் மனதில் தவறான எண்ணத்தை ஏற்படுத்தும் என்பதைத் தாங்கள் உணர வேண்டும்!

அது மட்டுமில்லை, ஏற்கெனவே அறப் போராட்டங்களுக்கு மக்களிடையே மதிப்புக் குறைந்து வரும் நிலையில், சொந்த மனைவியும், மகனும் நடத்தும் பட்டினிப் போராட்டமே தனியொரு மனிதனை அசைக்க முடியாதபொழுது, யார் எவரென்றே தெரியாத முகமறியாப் பொதுமக்களின் போராட்டம் எந்த வகையில் அரசு இயந்திரங்களையும் அதிகார மட்டங்களையும் பாதித்து விடுமென்கிற கேள்வியும், அமைதிப் போராட்ட வழிமுறைகள் மீதான நம்பிக்கையின்மையும் மக்களுக்கு இதனால் ஏற்படும்.

இவை எல்லாவற்றுக்கும் மேலாக, ஒரு போராளியே அறவழிப் போராட்டத்தை இந்த அளவுக்கு அலட்சியப்படுத்தும்பொழுது அதை நாம் பார்த்துக் கொண்டிருந்தால், அதிகார அமைப்பின் உச்சத்தில் வீற்றிருக்கும் நாட்டின் அதிபர்களும் பிரதமர்களும் தமிழர் பிரச்சினைகளுக்காக நாம் நடத்தும் போராட்டங்களை மதிக்கவில்லை என இனி நாம் குறை கூறவோ கொந்தளிக்கவோ இயலாத, அதற்குண்டான அறம் சார்ந்த (தார்மிக) உரிமையை இழந்தவர்களாக ஆகி விடுவோம் என்பது கோட்பாட்டியல் சார்ந்து (சித்தாந்தரீதியாக) இதில் மறைந்திருக்கும் மாபெரும் அபாயம் என்பதைத் தங்கள் அனைவருக்கும் பணிவன்புடன் நினைவூட்ட விரும்புகிறேன்!

இந்த விவகாரத்தில், கவிஞர்.தாமரை அவர்களைப் பற்றி இல்லாவிட்டாலும் இவர்கள் மகன் சமரனின் நிலை குறித்தாவது தலைவர்கள் கொஞ்சம் நினைத்துப் பார்க்க வேண்டும்!

இத்தனை இளம் வயதில், தந்தையுடன் வாழும் ஓர் அடிப்படை உரிமைக்காகவே தெருவில் இறங்கிப் போராட வேண்டிய நிலையிலுள்ள அந்தப் பிஞ்சு மனதின் எண்ண ஓட்டம் என்னவாக இருக்கும்? தன் தாயின் இனப் போராட்டங்கள் பற்றியும், அதே தாயின் சொந்தப் போராட்டங்கள் பற்றியும் நாளை முழுமையாகப் புரியக்கூடிய பருவம் வரும்பொழுது தன் பெற்றோரின் சமகாலப் போராளிகள் பற்றியும், தலைவர்கள் பற்றியும் அவன் மதிப்பு என்னவாக இருக்கும்? போராட்ட வாழ்க்கைக்குக் குடும்பம் தடையாக இருப்பதாகக் கூறித் தன் அப்பா தன்னை விட்டுப் பிரிந்திருப்பதை அறிந்திருக்கும் அந்தச் சிறுவன் நாளைக்குப் போராட்டம், புரட்சி, உரிமை ஆகியவற்றைப் பற்றி எப்படிப்பட்ட மதிப்பீட்டைக் கொண்டவனாக வளர்வான்? தமிழர் போராட்டங்கள் பற்றி அவன் என்ன நினைப்பான்? இதற்கான பதில்களைத் தலைவர்களாகிய நீங்கள் ஒரு நிமிடமாவது சிந்தித்துப் பார்த்தல் வேண்டும்! தமிழ்ப் போராளிப் பெற்றோர்க்குப் பிறந்த ஒரு மைந்தனே தமிழர் போராட்டங்கள் பற்றித் தவறான கருத்துக் கொண்டவனாக மாறினால் அதைவிடத் தமிழினத்துக்கு வேறு பெரிய இழப்பொன்று இருக்க முடியுமா என்பதைத் தமிழினத் தலைவர்களான உங்கள் சிந்தனைக்கே விட்டு விடுகிறேன்!

தமிழுக்காகவும் தமிழருக்காகவும் எத்தனையோ போராட்டங்களை நடத்தும் நாம் நம்மில் ஒருவரால் பாதிக்கப்பட்டுப் பெண்ணொருவர் போராடும்பொழுது, அந்தப் பெண்ணும் நம்மில் ஒருவராகவே இருக்கும் நிலையில், இதைக் கொண்டு கொள்ளாமல் இருந்தால் தமிழினப் போராட்ட வரலாற்றுக்கு அதை விடத் துடைக்க முடியாத களங்கம் வேறு எதுவும் இருக்க முடியாது என்பதை கூறி கனத்த மனத்துடன் இத்தோடு நிறைவு செய்து கொள்கிறேன்!

நன்றி! வணக்கம்!

❀ ❀ ❀ ❀ ❀

இற்றை (update): தாமரை அவர்களின் கோரிக்கையை ஏற்றுத் தோழர்.தியாகு அவர்கள் எழுத்துவடிவ மன்னிப்புக் கேட்டதாலும், மேற்கொண்டு அவர் கோரிக்கைப்படி தன் மீது விசாரணை ஆணையம் அமைக்கவும் ஒப்புக் கொண்டதாலும் கவிஞர்.தாமரை அவர்கள் தன் போராட்டத்தைத் தற்காலிகமாகக் கைவிட்டுள்ளார். மேலும் தகவல்களுக்கு: தியாகு நேரில் மன்னிப்பு: போராட்டத்தை தற்காலிகமாக முடித்தார் தாமரை!

படங்கள்: நன்றி கவிஞர்.தாமரை.

கீழ்க்காணும் வாக்குப்பட்டைகளைச் சொடுக்குவதன் மூலம் இந்த நீதிப் போராட்டத்துக்கு நீங்களும் கைகொடுக்கலாமே! கூடவே, உங்கள் செம்மையான கருத்துக்களுக்கும் காத்திருக்கிறேன்! தமிழில் எழுத வசதியில்லாவிட்டால் இருக்கவே இருக்கிறது கீழே 'தமிழ்ப் பலகை'! தனிப்பட ஏதும் தெரிவிக்க விரும்பினால் 'அணுக' படிவத்தைப் பயன்படுத்தலாம்! 

 பதிவுகளை உடனுக்குடன் பெறக் கீழ்க்காணும் பொத்தானைச் சொடுக்கி
வாட்சாப் தடத்தில் (Whatsapp Channel) இணையுங்கள்!!