13ஆம் உலகில் ஒரு காதல் - என் முதல் புதினம்! வெற்றி பெறக் கை கொடுப்பீர்!

அன்பிற்கினிய நண்பர்களே!

அமேசான் கிண்டில் நடத்தும் Pen to Publish 2019 போட்டியில் நானும் கலந்து கொண்டிருக்கிறேன் உங்களை நம்பி! வாழ்வில் முதன் முதலாக ஒரு முழு நீளப் புதினம் எழுதி இந்தப் போட்டியில் வெளியிட்டிருக்கிறேன். வெளியிடப்பட்டிருக்கும் நூல்களில் அதிகமாக விற்பனையாகும் முதல் சில நூல்களைத் தேர்ந்தெடுத்து அவற்றிலிருந்துதான் வெற்றி பெறும் நூல்களைத் தேர்ந்தெடுப்பார்கள் இந்தப் போட்டியில். எனவே உங்கள் நண்பன் நான் வெற்றி பெற வேண்டுமானால் நீங்கள் மனம் வைத்தால்தான் முடியும்!  அதற்கு நீங்கள் செய்ய வேண்டியது என்ன என்பதைச் சொல்லும் முன் உலகளாவிய இந்தப் பெரும் போட்டிக்குத் துணிந்து அனுப்பும் அளவுக்கு அப்படி என்ன கதை இது என்பதை முதலில் சொல்லி விடுகிறேன்.

13ஆம் உலகில் ஒரு காதல்!

‘மானுட சமுத்திரம் நானென்று கூவு’ என்னும் கவிதையில் உலகம் தழுவிய மனிதநேயத்தை வலியுறுத்தினார் பாவேந்தர். அதையும் தாண்டி ஒரு சிறு அடி எடுத்து வைக்கும் முயற்சியே இந்தக் கதை. ஆம்! இது உலகம் கடந்த மனிதநேயம்! அதே நேரம் நம் தாய்மொழிப் பற்றும் தமிழினக் கனவுகளும் கூடத் தொடக்கம் முதல் நிறைவு வரை இதில் இழையோடுவதை நீங்கள் உணரலாம். 

கதையின் தொடக்கத்திலேயே ஒரு பெண் தன் காதலன் தடுத்தும் கேட்காமல் பறந்து கொண்டிருக்கும் பறக்கும் தட்டிலிருந்து - பத்தாயிரம் அடி உயரத்திலிருந்து - கீழே குதித்து விடுகிறாள்.

ஏன்?...

தன் உயிரையும் துச்சமாக நினைத்து அவள் அப்படிச் செய்ய வேண்டிய காரணம் என்ன?...

காதலனைக் கூடப் பிரிந்து செல்லும் அளவுக்கு அவளைக் கீழ் நோக்கி இழுக்கும் அந்தக் கடமை எது?...

முதலில் அவளும் அவனும் பறக்கும் தட்டில் பயணிக்க வேண்டிய சூழல் வந்தது எப்படி?... 

உயரமான கட்டடத்திலிருந்தோ மலையுச்சியிலிருந்தோ கூட அல்ல, நேரடியாக வானத்திலிருந்து குதிக்கும் அந்தப் பெண்ணின் நிலைமை என்னாகும்?...

இந்தக் கேள்விகளுக்கான சுவையான விடைகள்தாம் இந்தக் கதை!

அடிப்படையில் இஃது ஒரு அறிவியல் புனைவு. வேற்றுலகில் மனிதர்கள் வாழ்வதற்கான சாத்தியக்கூறுகள் பற்றிக் கதையில் வரும் விளக்கங்கள் வெறும் சுவைக்காகச் சேர்க்கப்பட்டவை அல்ல என்பதை, அவற்றுக்கான ஆதாரங்களை இன்றும் நீங்கள் இணையத்தில் காணலாம். தவிர, சங்கக் காலம் முதல் நாம் போற்றிப் பாதுகாத்து வரும் நம் தமிழ்ப் பண்பாட்டின் இரு கண்களான காதலும் வீரமும் இக்கதையின் அகமாகவும் புறமாகவும் திகழ்வதையும் பார்க்கலாம்.
 

இதிலுள்ள மனிதநேயமும் தியாகமும் உங்களைத் திகைக்க வைக்கும்... 
தமிழ் உணர்வு உங்களை நெகிழ வைக்கும்... 
காதல் உங்களை உருக வைக்கும்... 
அறிவியல் உங்கள் சிந்தனைக்கு விருந்தாகும்... 

ஒருமுறை படித்துப் பாருங்கள்! இதில் வரும் என் கதை மாந்தர்களை, குறிப்பாக என் மகிழினியையும் மதியையும் ழகரனையும் நீங்கள் காலத்துக்கும் மறக்க முடியாது. தாய்க்குத் தலைப் பிள்ளை போல  என் முதல் புதினமான இந்தத் தமிழ் மணக்கும் படைப்பை என் நண்பர்களான நீங்கள் கட்டாயம் கைவிட மாட்டீர்கள் எனும் நம்பிக்கையுடன் உங்கள் முன் தவழ விட்டிருக்கிறேன்!

நூலைப் படிப்பது எப்படி? 

நீங்கள் கிண்டில் அன்லிமிட்டெட் திட்டத்தில் உறுப்பினராக இருந்தால் இந்த நூலை இலவசமாகவே படிக்கலாம். அதற்கு நீங்கள் செய்ய வேண்டியது:

1) கைப்பேசியில் உள்ள உங்கள் கிண்டில் குறுஞ்செயலியை (Kindle app) திறவுங்கள்.

2) அதில் Gnaanapragaasan என்றோ 13ஆம் உலகில் ஒரு காதல் என்றோ தேடல் பெட்டியில் எழுதினால் நூலின் பக்கம் வரும்.

3) அந்தப் பக்கத்தில் உள்ள Read for Free பொத்தானை அழுத்தினால் போதும். அந்தக் கைப்பேசியிலிருந்து மட்டுமில்லை கணினி, குளிகை (Tablet) என எந்தக் கருவியிலுள்ள கிண்டில் குறுஞ்செயலி வழியாகவும் அல்லது கிண்டில் மின் படிப்பான் (Kindle E-Reader) வழியாகவும் இந்த நூலை நீங்கள் இலவசமாகப் படிக்கலாம்.

நீங்கள் கிண்டில் அன்லிமிட்டெட் திட்டத்தில் உறுப்பினராக இல்லாவிட்டால் நூலைக் காசு கொடுத்து வாங்கிக் கிண்டில் வழியாகப் படிக்கலாம். அதற்கு நீங்கள் செய்ய வேண்டியது:

1) உங்கள் கைப்பேசியை எடுங்கள். அதில் உள்ள உலவியில் (browser) https://amzn.to/2qFuL4z என எழுதிச் சொடுக்குங்கள்.

2) இப்பொழுது வரும் பக்கத்தில் உள்ள Buy Now with 1-Click எனும் பொத்தானை அழுத்துங்கள். 

3) உள்நுழைய (Log in செய்ய) கேட்கும். உங்கள் அமேசான் கணக்கில் நீங்கள் எந்த மின்னஞ்சல் முகவரியைக் கொடுத்திருக்கிறீர்களோ அந்த மின்னஞ்சல் முகவரி அல்லது எந்தக் கைப்பேசி எண்ணைக் கொடுத்திருக்கிறீர்களோ அந்த எண் - இரண்டில் ஏதேனும் ஒன்றைக் கொடுத்து, கடவுச்சொல்லையும் (password) கொடுத்தால் உள்நுழைந்து விடலாம்.

4) அடுத்து வரும் பக்கத்தில் உங்கள் பற்று அட்டை (Credit Card), பண அட்டை (Debit Card), இணைய வங்கிச் சேவை (Net Banking), அமேசான் இருப்புத் தொகை (Amazon Pay Balance) போன்றவற்றில் ஏதேனும் ஒன்றைப் பயன்படுத்தி நூலை வாங்கிக் கொள்ளலாம். 

5) இப்பொழுது கூகுள் பிளே ஸ்டோருக்குள் சென்று கிண்டில் குறுஞ்செயலியை உங்கள் கைப்பேசியில் நிறுவி, மேலே சொன்னபடி உங்கள் அமேசான் கணக்கு விவரங்களைக் கொடுத்து உள்நுழைந்து விட்டால் அதில் உள்ள லைப்ரரி எனும் பிரிவுக்குள் சென்று நூலைப் படிக்கலாம்.

இந்த இடத்தில் இன்னொன்றும் நான் சொல்ல வேண்டும். 

நீங்கள் கிண்டில் அன்லிமிட்டெட் திட்டத்தில் உறுப்பினராக இல்லாவிட்டால் கூட இலவசமாக இந்த நூலைப் படிக்க முடியும். அதற்கு நீங்கள் இதுவரை அந்தத் திட்டத்தில் ஒருமுறை கூட இணையாதவராக இருக்க வேண்டும். அப்படி இருந்தால் பின்வரும் வழிமுறைகளைப் பாருங்கள்.

1) கிண்டில் அன்லிமிட்டெட் உறுப்பினர்களுக்காக மேலே கூறப்பட்டுள்ள வழிமுறைகளில் 3ஆவது படிநிலைக்கு வந்ததும் Read for Free பொத்தானை அழுத்துங்கள்.

2)  இப்பொழுது கிண்டில் அன்லிமிட்டெட் திட்டத்தில் இணைவதற்கான பக்கம் வரும். அதில் உள்ள Join Kindle Unlimited எனும் பொத்தானை அழுத்துங்கள்.

3) உள்நுழைய (Log in செய்ய) கேட்கும். மேலே கூறியபடி உங்கள் அமேசான் கணக்கின் விவரங்களைக் கொடுத்து உள்நுழையுங்கள்.

4) இப்பொழுது வரும் பக்கத்தில் உங்கள் பற்று அட்டையையோ (Credit Card) ICICI, சிட்டி பாங்க், கோடக் ஆகிய மூன்றில் ஏதேனும் ஒன்றின் பண அட்டையையோ (Debit Card) பயன்படுத்தி ரூ.2/- செலுத்தினால் அடுத்த ஒரு மாதத்துக்கு நீங்கள் கிண்டில் அன்லிமிட்டெட் திட்டத்தில் உள்ள நூல்களை இலவசமாகப் படிக்கலாம். அந்த வகையில் இதையும் படிக்கலாம். 

5) இதைச் செய்து முடித்தவுடன் பணம் செலுத்தப் பயன்படுத்திய அட்டையைக் கணக்கிலிருந்து நீக்கி விடுங்கள். இல்லாவிட்டால் மாதந்தோறும் உங்கள் வங்கிக் கணக்கிலிருந்து ரூ.169/- தானாகவே எடுத்துக் கொள்ளப்படும். அட்டையை நீக்குவது எப்படி என்பதை அறிய இந்தக் காணொலியைப் பாருங்கள் - https://www.youtube.com/watch?v=r-7KIw3tG74.

ஆனால் நண்பர்களே! இந்தப் போட்டியைப் பொறுத்த வரை எந்தெந்த நூல்கள் மிகுதியாக விற்பனையாகி, நிறைய கருத்துரைகளையும் நல்ல தரக்குறியீடுகளையும் (Ratings) பெறுகின்றனவோ அந்தச் சில நூல்கள் மட்டும்தான் நடுவர்களால் பரிசீலிக்கப்படும். அவற்றில் மூன்றுதான் முதல் மூன்று பரிசுக்குரியவையாகத் தேர்ந்தெடுக்கப்படும். எனவே நீங்கள் கிண்டில் அன்லிமிட்டெட் மூலம் படிப்பதை விடக் காசு கொடுத்து வாங்கிப் படிப்பது என் வெற்றி வாய்ப்புக்கு அதிக உதவியாக இருக்கும். விலை வெறும் ரூ.49/- மட்டுமே. இதை விடக் குறைவாக விலை வைக்கப் போட்டியின் நெறிமுறைகள் இடமளிக்காது என்பதால்தான் இந்த விலை வைத்திருக்கிறேன். என்றாலும் கதையைப் படித்துப் பார்த்தால் கண்டிப்பாக விலை குறைவு என்றுதான் நினைப்பீர்கள்.

அதற்காக நீங்கள் எல்லோருமே நூலைக் காசு கொடுத்துத்தான் வாங்க வேண்டும் என நான் கட்டாயப்படுத்தவில்லை. நீங்கள் கிண்டில் அன்லிமிட்டெட் மூலம் படிப்பதும் என் வெற்றி வாய்ப்புக்கான உதவிதான். இரண்டில் இதைத் தேர்ந்தெடுப்பது என்பது முழுக்க முழுக்க உங்கள் விருப்பமே! படித்து விட்டு உங்கள் கருத்துக்களையும் தரக்குறியீடுகளையும் மறவாமல் அளிக்க வேண்டுகிறேன்! 

*கருத்தும் தரக்குறியீடும் அளிப்பது எப்படி?

மேலே உள்ள https://amzn.to/2qFuL4z இணைப்பு வழியாக மீண்டும் போனால் அந்தப் பக்கத்தின் கீழ்ப் பகுதியில் Write a product review என ஒரு பொத்தான் இருக்கும். அதை அழுத்தினால் அடுத்து வரும் பக்கத்தில் முதலில் ஐந்து விண்மீன்கள் (Stars) இருக்கும். உங்களுக்கு எந்த அளவுக்குக் கதையைப் பிடித்திருக்கிறதோ அந்த அளவுக்கு அதிகமான விண்மீன்களை அழுத்துங்கள். சில நொடிகள் காத்திருந்தால் Submitted எனக் காட்டும். அவ்வளவுதான் நீங்கள் எனக்குத் தரக்குறியீடு அளித்து விட்டீர்கள்.

பின்னர் அடுத்த கட்டத்தில் கருத்தை எழுதி, அதன் அடுத்த கட்டத்தில் கருத்துக்கான தலைப்பை எழுதி முடிவில் உள்ள Submit பொத்தானை அழுத்தினால். உங்கள் கருத்துக்களும் பதிவாகி விடும். 

கருத்துக்களை ஆங்கிலத்தில் மட்டுமே பதிவு செய்ய முடியும். ஆங்கிலம் தெரியாதவர்கள் தமிழ்க் கருத்தையே ஆங்கில எழுத்துக்களால் எழுதலாம். அப்படிச் செய்யப் பிடிக்காதவர்கள் வெறும் தரக்குறியீடு மட்டும் அளித்து உதவலாம்.

இதுவரை நூலைப் படித்த அனைவரும் தவறாமல் இதைச் செய்து உதவ வேண்டுமாய்க் கேட்டுக் கொள்கிறேன்! 

கடைசி நாள்: டிசம்பர் 14, டிசம்பர் 31, 2019. அதற்கு முன் படித்து விட வேண்டுகிறேன்.

இப்படிக்கு,

காதலைச் சொல்லிவிட்டு, ஒப்புதல் தருவாளோ மாட்டாளோ எனும் பரிதவிப்போடு விரல்நுனியில் நிற்கும் இளைஞனின் மனநிலையுடன் உங்கள் கருத்துக்களுக்காகக் காத்திருக்கும் நண்பன். 

* பி.கு.: கட்டுரையில் முன்பு இருந்த தவறான தகவல் நீக்கப்பட்டு இந்தப் பகுதி புதிதாகச் சேர்க்கப்பட்ட நாள்: 05.12.2019.

 பதிவுகளை உடனுக்குடன் பெறக் கீழ்க்காணும் பொத்தானைச் சொடுக்கி
வாட்சாப் தடத்தில் (Whatsapp Channel) இணையுங்கள்!!