கூகுள் நிறுவனத்தின் பீட்பர்னர் (Feedburner) தன் மின்னஞ்சல் சேவையை வரும் சூலை 2021 முதல் நிறுத்தவுள்ளது என்கிற வருத்தமான செய்தியோடு வந்துள்ளேன்!
அதாவது, வலைப்பூவில் நாம் ஒவ்வொரு முறை புதிதாகப் பதிவு வெளியிடும்பொழுதும் அது மின்னஞ்சல் வழியே நம்மைப் பின்தொடரும் நேயர்கள் அனைவருக்கும் சென்று சேரும் இல்லையா? அந்தச் சேவை இம்மாத இறுதிக்குப் பின் கிடையாது! மேலே உள்ள படத்தைப் பாருங்கள்! விரிவான அறிவிப்பைக் காண அழுத்துங்கள் இங்கே!
மின்னஞ்சல் சேவை மட்டும்தான் நிறுத்தப்படுகிறதே தவிர நம் வலைப்பூக்களுக்கான ஊட்டங்கள் (blog feeds) தொடர்ந்து செயல்படும் என்பதாகத்தான் பீட்பர்னர் அறிவித்திருக்கிறது. ஆயினும் இது அதிர்ச்சியான செய்திதான்!
பேசுபுக்கு, துவிட்டர், வாட்சப் என எத்தனை சமுக ஊடகங்கள் வந்தாலும் அத்தனைக்கும் ஆணிவேர் மின்னஞ்சல்தான். நாம் புதிதாக ஒரு பதிவு வெளியிட்டதும் வேறு எங்கிருந்து நேயர்கள் வருகிறார்களோ இல்லையோ, மின்னஞ்சல் வழியே தொடர்பவர்களில் கட்டாயம் சிலராவது வருவார்கள். அவர்கள்தாம் நம் நிலையான நேயர்கள் என்றால் கூட மிகையில்லை. அப்பேர்ப்பட்ட சேவை நிறுத்தப்படுவது கண்டிப்பாகப் பேரிழப்புதான்! ஆனால் ஓர் ஆறுதலான செய்தி என்னவெனில் இஃதொன்றும் ஈடு செய்ய முடியாத இழப்பில்லை என்பதுதான்!
ஆம் நண்பர்களே! பீட்பர்னர் போலவே மின்னஞ்சல் சேவை வழங்கும் வேறு இணையத்தளங்களும் உள்ளன. அவற்றில் ஒன்றுக்கு மாறிக் கொள்வதன் மூலம் நாம் தொடர்ந்து நம் நேயர்களுக்கு மின்னஞ்சல் மூலம் பதிவுகளை அனுப்ப முடியும்!
ஆனால் அதற்கு முன் இப்பொழுது நாம் முக்கியமாகச் செய்ய வேண்டியது, ஏற்கெனவே பீட்பர்னர் மூலம் நம்மோடு இணைந்திருக்கும் நேயர்களின் மின்னஞ்சல் முகவரிகளைத் தரவிறக்கிக் (download) கொள்வதுதான். அதை எப்படிச் செய்வது என்பதை ஒரு சிறிய காணொளி மூலம் கீழே விளக்கியிருக்கிறேன்.
இதை முதலில் செய்து விடுங்கள்! பின்னர் வேறு மின்னஞ்சல் சேவைக்கு எப்படி மாறுவது என்பதை விரிவான பதிவாக / காணொளியாகத் தனியே காண்போம்!
இதற்கெனவே புதிதாக யூடியூபு வலைக்காட்சி (YouTube Channel) தொடங்கியுள்ளேன் நண்பர்களே! காணொளி விளக்கம் உங்களுக்குப் பயனுள்ளதாக இருந்தால் காணொளியின் வலக்கீழ் மூலையில் (right bottom corner) உள்ள ‘அகச் சிவப்புத் தமிழ்’ச் சின்னத்தின் மீது காட்டியைக் (cursor) கொண்டு சென்று, அங்கே தோன்றும் ‘SUBSCRIBE’ பொத்தானை அழுத்தி வலைக்காட்சியுடன் இணைந்து கொள்ளுங்கள்! அடுத்த கட்ட விளக்கம் உங்களுக்குத் தானாக மின்னஞ்சலில் வந்து சேரும்!
படம்: நன்றி பீட்பர்னர்.
பதிவுகளை உடனுக்குடன் பெறக் கீழ்க்காணும் பொத்தானைச் சொடுக்கி
வாட்சாப் தடத்தில் (Whatsapp Channel) இணையுங்கள்!!
இடுகைகள்
இது தொடர்பான தமிழ்ச்சரத்தின் பதிவு இங்கே..
பதிலளிநீக்குhttps://tamilcharamblog.blogspot.com/2021/06/feedburner-followit.html
மிக்க நன்றி தோழரே! தமிழ்ச்சரம் வலைப்பூவில் தமிழ்ச்சரம் தொடர்பான பதிவுகள் மட்டும்தான் வரும் என்று நினைத்தேன். பதிவைப் பகிர்ந்தமைக்கு நன்றி!
நீக்குபீட்பர்னருக்குச் சரியான மாற்று தேடிக் கொண்டிருந்த பதிவுலகுக்கு இவ்வளவு அருமையான, எளிமையான புதிய தளத்தை அறிமுகப்படுத்தியமைக்கு முதலில் நன்றி தோழரே!
நீக்குஆனால் வழிகாட்டலில் ஒரு பிழை இருக்கிறது.
சோதனைக்காக நம்முடைய வேறு மின்னஞ்சல்களில் ஒன்றையே கொடுத்துப் பார்க்கச் சொல்லி நீங்கள் பரிந்துரைத்திருப்பது வரை சரிதான். ஆனால் பீட்பர்னரிலிருந்து தரவிறக்கிய மின்னஞ்சல் முகவரிகளையும் அதே வழியில் நீங்கள் பதிவேற்றச் சொல்லியிருப்பது மிகவும் தவறு!
அப்படிச் செய்தால் நம் வலைப்பூவைப் பின்தொடர்வது குறித்து உறுதிப்படுத்துமாறு அவர்கள் அனைவருக்கும் மீண்டும் மின்னஞ்சல் (confirmation mail) செல்லும். அவர்கள் அனைவரும் ஏற்கெனவே நம் வலைப்பூவை மின்னஞ்சல் மூலம் தொடர பீட்பர்னர் வழியே விண்ணப்பம் அளித்து, இப்படி உறுதிப்படுத்தல் மின்னஞ்சல் வரப் பெற்று, அதையும் உறுதி செய்து விட்டவர்கள். அவர்களுக்கு இப்படி மீண்டும் உறுதிப்படுத்தல் மின்னஞ்சல் அனுப்பினால் அது குழப்பத்தை ஏற்படுத்தும். அது மட்டுமில்லை அவர்களில் பலர் உறுதிப்படுத்தத் தவறவும் வாய்ப்பு உண்டு.
எல்லாவற்றுக்கும் மேலாக இப்படி நாமே ஒவ்வொரு மின்னஞ்சலாகப் புதிதாகப் பதிவு செய்தால் நம் மின்னஞ்சல்கள் எரிதங்களாக (spams) வகைப்படுத்தப்படும் கண்டமும் (danger) உண்டு.
பீட்பர்னரிலிருந்து நாம் தரவிறக்கிய மின்னஞ்சல் முகவரிகளைப் பதிவேற்றம் செய்ய முறையான வழியை பாலோ-இட் நமக்கு வழங்குகிறது. ஆனால் அதை இங்கு விவரிப்பது கடினம். விரைவில் காணொளியாக வெளியிடுவேன்.
நன்றி!
இரண்டு மாதங்களாகவே இந்த அறிவிப்பு வந்து கொண்டிருக்கிறது. காணொளி பார்க்கிறேன்.
பதிலளிநீக்குநன்றி தோழரே! பார்த்து விட்டுச் சொல்லுங்கள்! :-)
நீக்கு